Хьадукар

               


Фукьан вушра а утканвал хьадукраз,
Беълийин гьар ву ухшар таза швушваз,
Умун гьава, зирек ашкьар, гъюдли укI,
Гьиссарира абцIнайи булагъсиб юкIв…

Итир улубзнайиси марццун гьарра
А дийибгъну, кюкдин кабар тIурччвури,
Я мичIли, я мани дару му вахтра
Ккуниб вузуз. Яризси ккилигури

Шулза, умуд киври гьарган хьадукрак,
ЦIийи уьмур ккебгърайиси гьар йисан,
Хъпехъураза мяълийихъ мани шавгьран,
КIваин хури йиз ккуни Табасаран…

Фукьан вушра а утканвал хьадукраз,
Беълийин гьар ухшар ву таза швушваз…