Йиф а дабхъри лизи хьаси,
Марцци шули а гьавара,
Гьибгъразуз махъвнан уьлкеси
Хючне гъул. БицIи вахтнара
Гьибгъруб шагьурсира аьхю,
Меркез узуз айи адру…
Дагъларин униъ айи гъул,
Гъира увухъ хъами йиз ул…
Мархьлин кьяляхъ шули гъати,
Гьялакди жабгъру Рубасра
Гьибгъуйзуз лап аьхю нирси,
Фу вуш кIурайи ашукьси…
Дагъдин зиин али гъала,
Гъира ву гъаравул гъулан,
Шагьид улихьдин женгарин,
Аднан гюмбет гъучагъвалин…
Думу вахтар гъябкъю Рубас,
А гъи ккебехъуз даршули,
Гагь тюнт шула, гагьсан яваш,
Фу вуш ухьукна пуз ккунди…
Йиф а дабхъри лизи хьаси…