Баядар лагьана хайи сувари,
Зи руьгьдиз руьгь гана лекьрен лувари,
Кьакьан кукушрикай кьеб авуна за,
Даях хьиз акуна аранни къуза.
Лап аял чIавалай зегьмет кьатIана
Уьмуьрдин рекьер за текдиз атIана.
Гьар чIавуз акъвазна жуван гафунал,
Дуьздини какурди вегьиз сафунал.
Гьатна четинвиле ,гъамар акуна,
Амма гардан кIирнач, зи юкь какунач,
Яргъална жувалай ялтахни ялахъ,
Хьанач зун хаинрин кьинерихъ чIалахъ.
Квадарнач лезги тIул,лезги такабур,
Хвена за хазина- лезгидин абур…
Таъсибар чIугуна дидедин чIалан,
Алакьна женгера вине кьаз Ватан.
Вуч хуш я килигун фейи йисариз-
Къастар михьи тир зи- хьанач кьасариз!
Гьакъикъат чуьнуьхнач , чинал лагьана,
Ахпа вуч жедатIа кичIе тахьана…
Вахт къведа,амукьдач зунни дуьнядал,
Пакаман несилри дамахдатIа чал?-
Кандай заз лагьана-гьалал хьуй, гьалал,
Халкь патал алахънай Далагьрин Билал!