Галатна аквар кьван тIурфанар, гарар,
Эхкъвез зал хквезва ракъурай чарар.
Яраб вуч жедатIа гила ви къарар,
Гьич тахьай и цIарар кIелдатIа вуна,
Мадни накъварикай селдатIа вуна?
Чун кьунвай адетрин муркар хайитIа,
ГьикI ятIа вун ахкун кьисмет хьайитIа,
Эвел хьиз ашкъидив салам гайитIа,
Кьил патал авуна хъелдатIа вуна,
Мадни накъварикай селдатIа вуна?
Алатна фейибур хтайтIа рикIел,
Ярувал къведатIа яраб а хъуьхъвел,
Белки зун вилив хуьз акъатна рекьел,
Гьиссер санал кватIна мелдатIа вуна,
Мадни накъварикай селдатIа вуна?
Кьисметди Эсли хьиз вунни гатайтIа,
Канивал дамарда, чанда гьатайтIа,
Садра «Билал амач»- хабар атайтIа
Дуьня чкIайди хьиз шелдатIа вуна,
Мадни накъварикай селдатIа вуна?