Сагърай, саламат!

   
Гъам галаз юзазва,  ванер нуькIверин,
КIурукIар  кьуранва чIурун  цуькверин,
Ярувал алатна   иер хъуьхъверин…
За гила  жузадач гьинва а къамат,
Къакъатна вач гила –сагърай, саламат!

ЧIулав къалин цифер гьатрай  сувара,
Лифер перишан хьуй  хайи цавара…
И начагъвилиз за жагъурда чара!
Лугьурай кьатIайда :им вуч аламат?
Къакъатна вач гила –сагърай, саламат!

Руьгь  хци  авунач гайи  къилавди,
Заз ифин акъуднач къизгъин  ялавди,
Лацудан аксида хьана  чIулавди-
Кьисметди «шагь» гана,  кьабулна за  «пат»,
Къакъатна вач  гила  –сагърай, саламат!

Амма гумир вуна чарадаз сирер,
Йисари сагъардач легьзедин  хирер…
Амукьрай зун патал   азабдин  йифер,
Чи  рикIел хкинар туна  аманат,
Къакъатна вач  гила  –сагърай ,саламат!