Ханна зIамига я Марем,
ХIете а – байна я сатем:
Цунна-м хов ше лелор фуд –
Сатем лехаш хьал-Iо уд.
Яле а ханна ше зIамиг,
ВIалла Iовдал яц йиIиг –
Шийна эшар дика ховш,
Я массане хьестар ловш.
Вешта оал цунах Марьяша,
Хул, цкъаза, из корта баьша,
ТIаккха кIаьнка тара лест,
Массане – сакъердаш – хьест.
Елаш хул, хьесталуш, хийла,
Бордаш сеттадеш а гIийла,
Цу хана цун бIаргашчу
Ше маярра, говзал гу.
Хов цун хоза хьоастаяла,
Дезар, къожа ца деш, ала,
Тоам ца хуле, эгош дегI,
ВIалла соцацалуш, елх.
ХIаьта а, я из Марем дика,
Ханна йоаккхагI ме хул – маька.
Кхийна яьлча, из мо йоI
Лохаш хургва хийла воI.
Иштта я йиIиг Марьяша,
Доаккхал ду цунах ший даьша.
Шун а аьттув ба из йовза,
Хуле шо а вIалла говза.
Февраль 2013 шу.