(Базоркин Идрис дагалаьца)
Со венав хьо волча, Къонах, –
Хьа боарза тIа – зерате.
Хьо везаш ба тахан вай нах,
Хьа цIи йоах цар лоархIаме.
Къонах яхачунна маIан
Гойтад Iа, мадарра, ше –
Тхо хьай, лоам мо, йолча яIан
ТIера даьхача гIоне.
Деза хиннад хьа дош, Къонах.
Цудухь даьд хьа селла сий.
Тахан бовзийтаб Iа хьай мах –
Хьол везагIа цхьаькха вий?
Из бахьанна ух со листа
Хьа боарза тIа – зерате.
Цамогаш хьа цIерца къаста;
Эше – хьона «Iунал» де.
Дагакхоаб аз яха ханаш,
Хьалха увт из хIара ди:
Хийла сона хьаькъал телаш –
Хьа багара мерза Iи.
Тахан тIехьа лов-кха, Къонах,
Iа нийсхон тIа вахар се,
Бакъдолчунца тоабеш вай нах –
Царца барте сайна Iе.
Март 2013 шу.