Заз чидач хьи, вуч ават1а ви рик1е,
Къизил яни, гимиш яни къеневай...
Вуч гьатнава вун к1анидан лап рекье-
Чир жедат1а ви амалар рик1евай?
Агъур жезва югъ -къандивай зи рик1из,
Ви ихтилат куьтягь жезвач, ярдикай?
Зи вилерал накъвар ала нур квахьиз,
Ивид ст1ал хкуд ийиз чандикай.
Памбагди хьиз кьунва цифеди тарар,
Фагьум - фикир какахьнава зи кьиле.
Чандавайди селлер ят1а, я харар?
Вун вуч къуш я, а хер авур зи рик1е?
Шумуд ава, къе ви рик1е, лагь на заз?
Акунач заз земзем булах яд гудай…
Экъвезва вун шумудакай ярар кьаз,
Зи чандани тунва ялав рик1 кудай.
Кьунач цуьквер багъишай ви гъилери,
Чилин къеняй яд тагана акъудай.
Аквар гьалдай вун къенева сирерин,
Амач гила са гафни заз лугьудай...