...ХЬАЙРЕ УЙЛАШ Мустафа Ганижев
Бийсан деррига тхьайсад,
во1 духхьала воаг1агвац.
Шолдана кулго лийхад,
янна нана го магац.
Цхьа бийсан сомавала,
цхьане вугаш ламазде.
Лазар сихлу къавала,
къамарга муш 1овд, хьо ве.
Хьона магац мукъвала,
урс хьокха муш ходабе.
Из-м арг1 я са д1адала,
юххера кхосалуш те.
Х1аьта латтаргда хьа чурт,
кхы хьо сома ца воалаш.
Кадуцей хургъяц хьа лартт1,
г1оде, орцаг1яла 1еш.
Даим дунен вахар довш,
сакхетам луш адама.
Хьай мухьа вац хьо варсташ,
хано вокъавеш - гома.
Бетта т1а бода никъ гуш,
уларгва хьо хьайх тийша.
Хьогахь, маьлха б1арг хьежаш,
хьай хало хьайца 1айша.
Сахулаш уйла лешаш,
хьона ха йоаг1а къажа.
Мераж т1ато1е мегаш,
лаьттах вала 1а харжа.
Хьежар хул бочавувлаш,
сигалар мух хьакхарца.
Бийсах цига така деш,
г1а гуш дунеца доаца.
Д1ахо урс хьекхаш къа дар,
седкъе легаш ялата.
Ди дера сигален кар,
хьокхаш букъа урс х1аьта.
Цу бийсан уллув вац ца1,
ала дог хьаст безама.
Гаьна седкъи хилац во1,
г1ойле еш цо хьа сина.
Хьа валар хьона дайра,
кхы сага ца гуш в1алла.
Кацудейс г1о ца дара,
г1аж бера яьккха лела.
Даим адам дахара,
т1ехь сакхетам гуш наьха.
Бордаш деташ хилара,
фена х1арак чудехьа.
Соцам беш малх хьежара,
хьожийташ хьо б1етта б1ар.
Сигалар наькъаш гора,
цига халхавала вар.
Иштта бийсанар уйлаш,
дугаш гаьна седкъашка.
Вайгар лазар хул дайлуш,
Кадуцей гаьнаяккха.
Деррига дар тамашне,
хул Заратаустра гуш.
Канта лерга мукъане,
хьаькъал хилар хьагуллуш.
Вий-вац, цо ца оалийташ,
ше нийссаг1а агностик.
Ха йоаг1аргъя са ца тувш,
вахар духа луш моттиг.
Уйланч хинна вар Рассал,
сатем наьха д1атебеш.
Цунга хилар ший массал,
къонах дика дагарвеш.
Вай хана бийсаш ухаш,
х1аране г1аж бе елла.
Из Кадуцей теш йолаш,
Бехкам белгало* хила.
Бехкам белгало* - символ…
20. 03. 2019 шу