Гъужауэ удз гъэгъа, мэ лъэпкъи имы1эжу
Тхылъ напэк1уэц1ым сэ къыщызгъуэтащ.
Сэ си псэм зы гупсысэ къыщыушри,
Сызэрыщыту сызэщ1иубыдащ.
Дэнэ ар къыщык1ар? Сыт хуэдэ гъатхэ?
Куэдрэ гъэгъауэ п1эрэ? Хэт къыпызычар?
Ц1ыху хамэу п1эрэ, хьэмэ ди ц1ыхугъэ?
Сыт щхьэк1эу п1эрэ ар щ1игъэт1ылъар?
И лъагъуныгъэм и фэеплъу п1эрэ?
Е нат1эм къритхауэ зэпык1а?
Е мы мэз жьауэм, е мы губгъуэ щэхум
И закъуэурэ къыщик1ухьар ара?
Псэужу п1эрэ мыр зи гъэт1ылъыгъэр?
Е нобэ и хэщ1ап1эр дэнэ деж?
Дэ дымыц1ыхуу гъужа мы удз гъагъэм
Ещхьу езыхэр дунейм ехыжа?