ДАДИКОВ Г1АЬНАХЬ ГУШ
Сона г1аьнахьа ейра – яха зама,
цига йоагаеш, 1ошаьреш Дадиков;
цол къиза, ирча дарий цхьаккха х1ама –
миска са къам леш, хьалакдаь, лар д1айов?
Цига вахар дув, къаьра ди кхаьча,
гобаьккха гора 1азап, адам довр;
цу хана вахаш, цу заманцар дог дайча,
са д1а-х1а кхоача, хилац дог-уйла ловр.
Сомаг1а хиннар д1адовш хул фаьлга тар,
цу ханах гаьнавалар дац бакъхилар,
сигале сийна яр, лаьтта 1аьржа дар,
1алам сомах мо, б1арга делацар.
Х1аьта нах бисараш – дувхаш бахар –
Г1аьнахь гуш, из даха вахар, дувхар,
Со цу нахах волаш, адам ма дар,
Цига дайнар, керта хьочу дисар.
Тешаргвацар изза морг гу аьлча,
доккха са доахаш, садаха ваьлча,
саг тешаргвацар, цу къиза ханах,
юхе бадар, са увзаш бар тха нах.
Моалой къизал яр т1къамаш доахкаш,
массами1инга т1акхоачаш дорха;
кхалсаг, мархьар бераш, къабанараш,
дийнабий хьежаш, боабеш уш лаьрхх1а.
Сага ма голда из г1аьнахь дайнар,
з1амигача къаман низ ца хилар;
бадда к1алхьарбала моттиг яцар,
гобаьккха ж1алий-моастаг1ий лелар.
Дадиков 1ошаьряр, цу хинна метте,
цхьа хьетт мара цох моалош ца юташ,
юкъ-юкъе к1уралг ураг1бод сатте,
из юхера даьга хаьшкаш гойташ.
Сигала та1а морхаш яр ухкаш,
хьахозаш моалой наьха къамаьл дар,
г1атта даха хьазилга никъ бехкаш,
къиза моастаг1 г1алг1ай лаьтта лелар.
23. 03. 2018 ш.