Гьиссер амукьдат1а

 
Кьве гур эцигнава сурарин  вилик-
Кьве инсан паталди агакьна кьиникь.
Садал- къацу хара,  муькуьдал –чIулав,
Гьава  вуч  залан я, акажнава цав…
 
Кьуд патахъ   чкIизва ишелрин ванер,
Сузайри падзава  рагарин къванер.
Садаз тажуб жезва чи  гурар  акун,
Сада лугьузва им   - кьисмет абурун…
               
Амма кьве руьгь ава   аршдиз акъатна,
Рахазва верцIидиз мукьвал  агатна,
Амач мад арада залум часпарар,
Сад садаз лугьузва : чун я бахтавар!
               
Вуч хъсан тухдалди рахада чун къе,
Эхирни саналди гьатна чун рекье!
И фани дуьняди  аман ганач чаз,
Санал уьмуьрдайвал гъил гъиле аваз…
               
Ахварай аватна зун ягъайди хьиз,
Килигиз амукьна ахъа  дакIардиз…
Экуьнин нурар зи  чина акьуна-
Ракъинии чкадал  заз вун акуна!
 
Анжах  къалабулух  акатна чандик:
Ашкъи  кумукьдатIа  кьейила  тандик?
Руьгьерихъ и гьиссер  галамукьдатIа,
А чIавуз  чи рикIел аламукьдатIа?