Алакьайт/а менфятлу зат/ар тваз хат/ара
Шаирди ч/ехи авунвай рик/ин къатара.
Хуш хьанват/а халкьдиз ва хийир гуз алакьиз
Чешмедавай яд хьиз физват/а ам алахьиз
Шиир хьурай т/варни адан мубарак хьурай!
Тунват/а ам кхьей касди вичин къайдада
Михьна, к/ват/ хъувунват/а зат/ авай кьарада.
Алат хьиз инсанри кьунват/а гъиле гафар
Къалин жез яд хьиз булахда , жезват/а вац/ар.
Шиир хьурай адан т/варни , мубарак хьурай.
Гафар ялзавачт/а вуна ваз к/ени патахъ
Ваз чизват/а уртахди гьа вилик квай чанах.
Керки герек туш , хци мишер ават/а вахъ
Ви терездин дуьзвилихъни халкь ят/а ч/алахъ
Шиир хьурай адан т/варни , мубарак хьурай!
Къелемдин хцивал къалурнават/а вуна
Гафар гьа къванер твадайд хьиз, тунват/а цла.
Регьят ят/а зарб кваз к/елиз гъвеч/и- ч/ехидаз
Рик/е лепе твадай ц/арар ят/а виридаз
Шиир хьурай адан т/варни , мубарак хьурай!
Гъалат/арни хьун мумкин я , тахьурай айгьам
Акъудначт/а ч/уру фикир , рик/е туна ам
Атанват/а сифте гафар, гуьгъуьнлай макьам
Гуя ракъурнава рик/ин чими тир салам
Шиир хьурай адан т/варни , мубарак хьурай!