Ккун дубхьна ич бицIи Аьлдиз,
ТIирхуз укIу завун аьршдиз.
Аш ипIуйи, никк убхъуйи-
Космонавт хьуз ккундийи.
Адашди гъабхи шагьриан,
Дугъаз ракета лап уткан.
Гьяятдиз удручIвди хул’ан,
Дид’ин духьна бегьем гьяйран.
Ккун апIура Аьлди бабкан,
«Уягъ апIин» - кIур, гвачIнинган.
«Ахсрар ккивси, дарш шулу кьан.
Аьршдиз тIирхурза лисунган».
Саб геренди ккудубкIну йишв.
Хъяркьяйизра Аьлди улар,
Бабу апIури а дихар
«Гъудужв! Лисун духьна йигъар!»
Хъа Аьли хъергрира адар,
Суфрайихъ диврашра хинкIар.
«Гъитай! Белки хядарикан,
Рякъюрашул бализ нивкIар».