Ша, ацукьин са суфрадал
Таяр–туьшер, дустар вири,
Буьркьуь–кьецlи, кесиб гьалал,
Рикlикайни хабар жери.
Гьуьрмет чидай "дуст" гафунин,
Хабар жедай ви гьалдикай.
Хъвалав хьайла рикl–дуркlуниз,
Хьурай вични кьегьалрикай.
Шадвилизни шадвал ийиз,
Дустаринни къадир авай,
Кьегьалвилел амал ийиз,
Сагърай инсан фикир авай.
Паталлайди цlалцlам акваз,
Жувандакай кьил къакъудмир.
Са легьзеда ацукь, акъваз,
Гьуьрметдинни вил акъудмир.
Вине кьунихъ, къимет жеда,
Гьал–агьвалат чир хьайитlа.
Тахьайтlа ваз туьгьмет жеда,
Лавгъадин есир хьайитlа.
Дуствал квахьда, кlеве хьайла,
Багьнаяриз, кьил къакъудиз.
Ви гьар са кар вине хьайла,
Ахпа ялда, дул къакъудиз.
Иеси хьухь тамамвилин,
Гьуьрметдинни ва къайгъудин,
Лукl тежервал авамвилин,
Алчахвилинни, агъудин.
Ша, ацукьин са суфрадал
Таяр–туьшер, дустар вири.
Пlеркьи–кьецlи, кесиб гьалал,
Рикlикайни хабар жери.