Сыхуэхьэзыркъым сэ дунейр збгынэну,
Зэман си1ащ сэ, гъащ1и къэзгъэщ1ащ.
Сыхунэсакъым куэдым згъэзэщ1эну,
Иджыщ акъылыр псоми щынэсар.
Сыхуэхьэзыркъым бынхэр сыут1ыпщыну,
Сазыхуехъуапсэ куэд яхуэзмыщ1а.
Сэр щхьэк1э сэ си бынхэм ялъэк1ынур
Нобэ къыздэсым къызгурымы1уа!
Дапщэщ хьэзыр сэ сыщыхъунур, сщ1эркъым,
Зы сывгъэлъагъу абы хуэхьэзыра!
Укъыск1элъыджэми зэгуэр си жагъуэ сщ1ынкъым,
Сыхунэбгъэсмэ сызыщ1эхъуэпсам.
"Ухуейти куэд!—сэ сощ1э къызжеп1энур, -
Уи1а зэманым утеплъэхъук1ащ!"
Уи упщ1эм мы жэуапыр сэ естынущ :
"Си1ащ зэман, ар псынщ1эу с1эщ1эк1ащ! ".
Сэ сощ1э, илъэсищэ дыпсэуами,
Ди 1уэхур тщ1эну дэ дримыкъун.
Зэманым дыщогугъыр дэ ит1ани,
Къытщохъур псоми дак1элъысыжын.
Зы 1уэху дыухмэ, адрейр к1элъок1уэ,
Гъащ1э архъуанэм дэ доджэрэзыхь.
Гугъуехь зыкъомми гъащ1эм дыщыток1уэ,
Дэ тщ1эми, гъащ1эр - ар пы1эзэф1эхьщ.
Сыхуэхьэзыркъым сэ дунейр збгынэну,
Сыхуэхьэзыркъым бынхэр сыут1ыпщын.
Архъуанэ бзаджэм щхьэр яхутезгъап1и
Абы щысхъумэм, сэри сыхьэзырщ!
Июнь, 2019гъ