Атун хьайтIа...

   
Куьн хабарсуз зи суракьдиз атайтIа,
Мумкин я зун жагъидач квез чкадал.
«Мус хкведа»,-лугьуз кIеве гьатайтIа,
Акъваз мийир вил эцигна пакадал.

Я къекъвемир захъ меркездин яцIара,
Гьахьиз тахьуй руг, гум авай басрухдиз.
Зун кьуьгъуьр туш уьмуьрзавай цацара,
Са гел кьуна физ-хквезвай къурухдиз.

Чакъални туш чка кьунвай нацIара.
Ирссагьиб я къабиладин лекьерин.
Зи хабар яхъ Ахцегьани КцIара,
Авай  кас я мензил атIуз рекьерин.

КIелед хивел, Шарвилидин кIвалакIдал,
Алаз хьайтIа амукьич квез такуна.
Тахьана хьуй элкъуьгъ Къуба пайтакIдал,
Зун гьалтда квел Абилован паркуна.

Кьве синел кьве кIвач эцигна тIарамдиз
Бармакда хьиз кьил акIурна булутда,
Пагьливандин  рикI хураваз хуррамдиз,
Зун сувахъан аквада квез Къурушдал.

Бикед  дагъда къацу чIурал, яйлахда,
Низ кIан жедач чубан хинкIар гьатайтIа !
Къуьнерихъ лит, терекмадин саягъда.
Жагъин квез зун , белки гьанай, атайтIа.

Кваз такьуна сиясатни сергьатар,
Чалагъан хьиз элкъвезва зун кIубандиз.
Садавайни жедач ийиз кьегьатар
Заз цавни чил багъри лезги ватандин !

Хабар ая вахтунда куьн къведалди.
Яр-дуст, мугьман кьабулиз зун вердиш я.
Хкатнавач, кума квай тIул къедалди,
Жуван хайи чилел кьару девриш я !