Шауаланы Разият
АЛЛЫНГА КЪАРАП ТУРАМА МЕН
– Ачытханма бюгюн да cени.
– Хар кюнде алай болуп келеди.
– Бир кере бир айтчы кертини! –
Айтырынг чарсха кетип, ёледи.
Этгенинг – ушамай сёзюнге,
Экибиз эки жолну барабыз…
– Бошалып къалады тёзюмюм…
(Бир бирден аны ёнкюч алабыз!)
– Сен бола турамыса тели?
– Хау, сенсиз жашау жашау тюйюлдю!
– Бир тохта, къаратма да элни!
– Насыбым бата тургъан кюнюмдю:
Сен ауруйса, жюрегим – жалан,
Сабийле къарайдыла мудах.
Дуния болуп къалыр жалгъан,
Эшикни къакъса бизге палах.
Къаты бол, аны ангылап, сен,
Таукеллик – антлы нёгер санга.
Аллынга къарап турама мен,
Къар басмазча эт бери жолла.