Шауаланы Разият
ТУУГЪАН КЮНЮНГДЕ
Туугъан кюнюдю бюгюн жашымы,
Къууанч кюнюдю бюгюн жашымы!
Алгъыш айтадыла анга келген,
Жюрегини ачыкълыгъын билген.
Андан мени бир кёп сакълагъаным,
Ол хар жерде мени жокълагъаным!
Сабий болуп, баям, андан болур.
Анга этген алгъышларым толур.
Къартлыкъ жашыды ол юйюбюзню,
Жарыкъ этген мудах кюнюбюзню!
Андан тилейме мен анга къарыу,
Баргъан жолу болсун ачыкъ, ариу.
Ол айлансын къайда да сау-эсен,
Атасына этерча билеклик.
Ол ингирде юйге кирип келсе,
Толгъанына шексизме тилекни.
Жангы тюйюлдю баласын сюйген.
Айтсанг аны, айып да этерле.
Алай а, болмаса къаш-баш тюйген,
Умутунга бир тынчды жетерге.