Шауаланы Разият
ТЕЙРИГЕ БАШ УРДУМ
Бир сууукъ кюн Аллах тюбетди да бизни,
Жаз хауамы урду бетлеге? –
Жарсыуум чачылды, – да Тейрими тизди? –
Жанкъылыч созулду кёкледе.
Кёзлерим къууанып, мен жукъ кёрмей турдум,
Да кирдим сюймеклик долайгъа.
Мен Уллу Аллахха тилекде баш урдум,
Биргенге ёмюрде болургъа.
Ёсдюргенбиз жашла, къыз чыкъгъанды юйден.
Не чабады заман атлары!
Къууанчдан да алдыкъ, юлюшлюбюз кюйден…
Къадарым баламда къатланыр.
Ма кюледи эрттен къагъанакъ кёзюнден,
Эхчерикди бешик тилегим.
Танг жарыйды, къара, анала сёзюнден,
«Тынч жукъла, – дей, – ариу билегим…»