Йигъар гъяра нубатнахъди гьялакди,
Йисарихъди хъана йисар тIирхури.
Багъри гъулаз чан аязар хуз ккунди,
Чвул гъяйизра кьюрд ашул ккилибгури.
Гъяркъзуз сан байвахтнакан вуй нивкIар.
Хулан унчIихъна дуфнади хьадукар.
НивкI’ан уягъ апIуз чарйир зигури,
КуркIри му йиз уларик ригъдин нурар.
Чру духьнади гъяркъюнзуз багъри дагълар,
Кюкйири хяр накьишдихъди балгури.
Гъайгъусуз духьну узу гъизгъин уьмриъ,
Майдандиин дустарихъди жаргъури.
Аьхир адру вахт даринхъа бахтавар!
Сивариан гъяра марцци булагъар.
УкIу завуъ нурлу дапIнайи ригъди,
Магьа уткан сесер тувра псинчIари.
Амма йигъар гъягъюра нубатнахъди,
Вазарихъди дишла вазар тIирхури.
Артухъ шлуган йиз уьмур вуйза шадди,
Амма ич баб гьаз-вуш шуйи пашманди.
***
Байвахт уьмриъ гьарсар касдин,
Девир ву бахтлу, успагьи.
Гьяйиф, гъубш вахт сюгьюр кайи,
Аьламатдихъди абцIнайи…