Лугьумир заз мад са гафни...
Лугьумир гьич мад...
И дуьньяда зун инсанни,
Туш ваз-аламат!
К1ан хьайила са ихтилат,
Ийида на гагь,
Рахун, хъуьруьн амач жал мад-
Кисда вун, Аллагь!
Вун багъманчи, зун багъ тирни,
Я рик1 ч1уру къван?
Вун заз авай са дагъ тирни,
Акъудиз зи чан...
Ви вилерай гьик1 аквазва,
Зи кайи тир хам?
Гьар са гаф на риб хьиз кьазва,
Вегьиз кьулухъ кам...
Гамун ц1ийи чешне хьтин,
Гваз хьана зав вун...
Гар къекъвезвай серин чуьлдин,
Хура къвазна зун.
Як тадач на зи к1арабдал,
Ат1уз дериндай...
Тух жезвачни вун гьарамдал
Гьикьван ширинда?
Рик1 акъудна тада за вав,
Килиг жув гьадаз...
Аватай зи гуьзгуьдин нагъв,
Цп1ел жезва хаз.
Ругь къекъведа шагьвар хьана,
Жейрандин геляй...
Ирид цавар, ирид чилер ,
Лугьуз а рекьяй..