Низ чидай кьван вахтар ик/ хьун
Са зат/ни амач накь хьиз.
Гьи къайдада ваз жаваб гун
Лигим хьанва зун ракь хьиз.
Дегиш хьанва зи гьаларни
Т/ебиатдин гьалар хьиз
Къачузмач рик/и къаларни
Вилер шезмач кьагьар гъиз.
Умуд квай кар на хиве кьур
Гару яргъаз тухвана.
Марварар зи хуруда тур
Къенин хару гатана.
Зун кьисметди ц/а тунвайди
Къе гъавурда акьуна
На масадан гъил кьунвайди
Вилералди акуна.
Текдиз рекьин къерехдавай
Чинардиз за ганай сир
Ат/уз тахьайди рехъ завай
Адаз тадиз хьанай чир.
Юзуриз пеш к/ват/на ада
Чигедикай са ст/ал
Зав гвайдини белки ят/а
Бейкеф хьанвай рик/ин гьал.
Рахана зав вичин тегьер
Кич/ ква лугьуз гьиссерик.
Атай гару вичин пешер
Вегьейвиляй к/вачерик.
Шагьид хьайи вахт заз хвашна
Зи къаст чириз атанай.
Ви к/енивал ч/алал гъваш на
Лугьуз зав мад раханай.
03.08. 2011.
Г. Мисриханова.