Кlвалевай паб гатадайди,
Паб аял гваз тек тадайди,
Кьве мецелди рахадайди,
Итим яни ам?
Акъуддайди куьчейра йиф,
Кlандай вичиз вичин тариф,
Дишегьлидал гзаф зайиф,
Итим яни ам?
Гайи гаф гьич хуьн тийирди,
Кlвалах ийиз фин тийирди,
Писни хъсан чин тийирди,
Итим яни ам?
Вичин ч1арар ят1ан рехи,
Кьадар течиз хъваз лап ички.
Хъуьруьрдайди гъвеч1и-ч1ехи,
Итим яни ам?
Санал тlуьр фу квадардайди,
Намус чилел гадардайди,
Жуван к1вализ зарардайди,
Итим яни ам?