МоллагIа байт Iа язъеш хилча
ГIартам нийсбе атта дац,
Бакъда, новкъост эзди хилча,
Цох дар ала хала дац.
Ши саг вIаший хоттавелар
Даьлера деза совгIат да,
Денал дола новкъост хилар,
Мах бергбоаца ираз да.
Дукха ха еце а, вай шиъ довза,
Хьасан, сона хьо хийра вац.
Сай ма даггара велча вовза,
Хьо ховенна моттиг яц.
Дукха мах ба-кх цу дешаца –
ДоттагIа, атта хулаш вац.
Шийгахьа ираз долча сага
Хьасан, цIаккха вицлургвац.
Нагахь, гIулакх тIахьой цунна,
Ший низ кхоачар цо дергда.
Шийга тIеххьара дисар денна
Товр даь, хьо дIавохтаргва.
Хьай дезалца маьрша волаш
Вахалва хьо, ираз долаш.
Хьайна безарех цакъасташ,
Ялсмала гIолва корта ийбеш.
Матенаькъан Илез