МЕЦИКАЙ СА РИВАЯТ
I
Сад Аллагьди халкь авурла инсанар,
РикI хуруда кIевна, къуш хьиз кьефесда.
Адан кIвалах авун патал хъсанар,
Ара датIуз, таъминарна нефесдал.
Мецел рахаз ганвайди са инсан я,
Гьа кар себеб, мез виридаз масан я!
Тек са мез я, аквазвайди сивевай,
РикIин векил, рахазвайди рикI патал.
Тамамариз вири буржар хивевай,
Чаз герекди, шадвал патал, йикь патал.
Гьи касдивай сивевай мез хуьз жеда,
Адан крар, гуж тагана хуьз жеда.
Мез - куьлег я, ахъайзавай рикIин рак,
Лайлай ягъиз велед патал дидейри.
Гьич саданни акат тавуй мез сарак,
Ам сагъ тежер хер я авур гуьллейри.
Шад мез– хъуьтуьл, кIеви чIавуз–мез ракь я,
Рахаз чидай кас патал мез – яракь я.
Меци кьада ярар-дустар, шад рахаз,
Межлис жеда, мехъер жеда, мел жеда.
Аллагьди хуьй, кIан жемир квез кефи хаз,
РикIяй-рикIиз кIани дустни хъел жеда.
Ширин меци чIалал гъида къванни кваз,
Четин чIавуз хуьз алакьда чанни кваз!
II
Япариз – ван, акур затIар вилериз,
МефтIеди чи хуьда кьиле саламат.
Цавуз лув гуз, эвичI ийиз чилериз,
Акур кьадар агъзур жуьре аламат,
Акъуд авун патал са-сад къецелди,
Чна кIвалах ийизва чи мецелди.
Кьежей мез я, рахаз кIани патахъди,
Инсандикай сагьиб хьурда кьисметдин.
Мез рахана кIанда къени патахъди,
Баркаллаяр къачун патал гьуьрметдин.
Ахьтин ксар, лекьер хьана цаварал,
Алаз жеда гьар са шад тир суварал.
РикIевайди акъуд жеда мецивай,
Рахазвай кас вуж ятIа чир хьайила.
Мецер ава, хабар кьур хьиз къванцивай,
Лугьун тийир, саламат сир хьайила.
Игитри сир маса тагуз, чан гуда.
Ватан маса гайибуруз - къван гуда.
КIанид патал, рикIни мез – чи дустар я.
Сада садаз гафар лугьуз ширин тир.
РикI – камал я, мез кар чидай устIар я,
Гьар са кардин дувул чидай дерин тир.
Уьткем рикIни, мез хьайила сивени,
Садавайни тваз алакьдач кIевени.
III
Яргъал рахаз жеда чавай мецикай,
Чахъ гьар садахъ жуван жуьре мез ава.
Бязибурухъ мецер ава къванцик квай,
Ахьтин меци, хуравай рикI нез ава.
Меци авур хер сагъ авун – четин я.
А жуьре мез сиве хьун са батин я.
Мез ширинда, рикI къенида дуьньяда,
Ислягьвал тваз, алахъда халкь сад ийиз.
Акъуд ийиз, авай чуьруьк арада,
Хъуьрез-хъуьрез, алахъда халкь шад ийиз.
Ширин меци чIугур чIавуз зегьметар,
Дустар жеда гьар жуьредин миллетар.
Амма рикIе – сад, меце – масад авай,
Инсанрикай хуьрай, Сад тир Аллагьди.
РикIе – агъу, сиве туькIуьл яд авай.
Мецерикай хуьрай Сад тир Аллагьди.
Ахтинбурун гьат авуртIа, арада,
Вири уьмуьр акъатда чи кьарада.
Меци лугьуз, чпиз къачур инсанар,
Гзаф ава, зияндизни, хийирдиз.
Мез себебда, кутаз тахьуй нукьсанар,
Мез дуьз рахух, гьам хийир, гьам шийирдиз.
Мез саламат хвейи касди кьил хуьда.
ЧIуру крар тавун патал, гъил хуьда.
IV
Гзаф рахун – гимиш, тIимил – къизил яз
ГьисабайтIа, регьят жеда мецизни.
Залан тир пар ялун патал кьезил яз,
Чиз рахайтIа, менфят жеда мецизни.
Пул гана, шейъ къачурди хьиз туьквендай,
Меци, гъуьлягъ, акъуддалда тIуьквендай.
Са гъуд кьван рикI, кьве тIуб кьван мез инсандиз,
Кьисметнава, къачур чирвал гун патал.
Вафалу яз хайи халкьдиз, ватандиз,
Баркаллаяр къачудайбур хьун патал.
Лугьудайла, гаф рикIевай, мецевай,
Бейкеф мийир, гьич са касни къецевай.
РикIи лугьуз, меци лугьуз манияр,
Ажеб хъсан затI тушни чи жегьилвал.
Багъда къекъвез, галаз рикIиз кIани яр,
Им тушни кьван чи кьисметдин къизилвал?
Сагърай чи рикI, сагърай чи мез виртIедин.
Къачуз жедай сенгерар гьар къеледин!
Сажидина мецикайни рикIикай,
Ахъайна квез, туькIуьрнавай риваят.
ЧIуру гафар лугьуз вердиш рикIик квай,
Ксар тахьуй, мез кицI хьана, сив – гьаят,
Сив – цуьквед багъ, мез, сивевай билбил жен,
Яш хьайитIан, рикIе ачух гуьгьуьл жен.