Я ар амач, айиб амач,
Акьулдихъни я диб амач,
Бязибурухъ сагьиб амач;
Чаз ихьтин мад къар герек туш.
Дугъридикай ийиз бугьтан,
Пичlидикай ийиз тlурфан,
Чир хьайит1а писни хъсан;
Чаз ихьтин гьунар герек туш.
Намуслуди зайиф лугьуз,
Гьаясузди ариф лугьуз,
Къаргъадини вич лиф лугьуз;
Чаз ихьтин гафар герек туш.
Зурба хьайла кесибдин гьал,
Вичи вичив къачуда къал,
Бармакдални алукlиз шал;
Чаз ихьтин папар герек туш.
Дишегьлидал ийиз гьужум,
-Зун итим егь,- лугьуз залум,
Квахьна намус, квахьна фагьум;
Чаз я и санкlар герек туш.
Иеси кьей корон вирус
Я ягь авач вахъ, я намус,
Садбуру ваз лугьуз жасус,
Чаз ихьтин азар герек туш.
Гьалал гайдал рази тежез,
Тагайдан физ винел элкъвез,
Алахънавай негьякьди нез;
Чаз ихьтин я т1вар герек туш.
Нукlре вич са лякь я лугьуз,
Гьар санал вич гьакь я лугьуз,
Вичин далу халкь я лугьуз;
Чаз ихьтин къушар герек туш.
Акьуллу гаф сиве тlакьаз,
Гьая тахьун хиве тlакьаз,
Жуваз жуван гьилле такваз;
Чаз ихьтин ксар герек туш.
Я тербия чир тахьайла,
Рикlе иман, пlир тахьайла,
Келледиз таъсир тахьайла,
Чаз я вич, я тlвар герек туш.