Узун, юкъусыз геджелер
Кёр куньлерни денъиштире.
Арзуларым — бу инджилер,
Безек узюльди... илише.
Сенсиз къанатларым сыныкъ,
Яваш-яваш ерге тюшем.
Буллюр эдим. Амма тыныкъ
Парчаларын арап юрем.
Баарьнинъ единджи куню
Кимге ашкъ иле бакъасынъ?
Мен бу дюньяда бир озюм
Козьяшым, неге акъасынъ?
Сенсиз кокке учалмайым,
Къанатларым багъланылгъан...
Янъы китап ачалмайым,
Къайда къысметим сакълангъан?
Фелегим йыкъылып кетти,
Бельгисизлик — яваш олюм.
Учурым четине етти
Первасыз, туманлы ёлум.
Сенсиз къанатларым сыныкъ,
Ерге тюшем. Ай, тут мени!
Куль олып кетер бу яныкъ
Эгер бир кунь тапсам сени!
Апрель 12, 2020 с.