АМАЧ ЗУН ГИЛА

               
Бугъадиз элкъвена булахрин ятар,
Навар хьиз какахьна цаварин къатар,
Перишан  жедатIа ваз чидай патар-                Амач зун гила.
 
Алахъмир лекьерин гуьгъуьна лув гуз,
Цифера квахьда вун   са зулун юкъуз,
Фена   секинвилив «вун» лугьуз –лугьуз,
Амач зун гила.
 
Ви балкIан яргъади - кьатIуз жедач ях,
Бегьем кьил авачиз  кьутягь хьана мах,
ЦIверекIар ахквадач, кьеженва чахмах,
Амач зун гила.
 
Квахьунал кьвалара акьазвай ванер,
ВацI зайиф такурай, падзавай къванер,
Вахтари чIугда ви дамахдин  кьенер,
Амач зун гила.
 
Живеда гьатайла  мулдин цуьк нагагь,
Кьенвай гьиссерикай лагь, манияр лагь,
Амма суал гумир «гьинватIа  Далагь?»,
Амач зун гила.

                07.12.19