КIанивал кучуда

               
Яргъа аватIани къведа ваз хабар
Зун фана дуьнядай гьахъдихъ фейила,
Югъ такур рикIелай алудиз къабар,
Шехьа вун тухдалди шаир кьейила.
 
Ахъая чи сирер кутаз лугьунрик,
Чун гьикI алугнатIа, чун гьикI канатIа,
Килигмир вуж гала, вуж галач кьилик,
Лагь чун кьвед кьисметди гьикI гатанатIа…
 
Аршдиз кьван  акъатрай азбадин  шелер,
КIаниди абурдив рекье тур вуна! 
Авахьиз  фирай лап накъварин селлер,
Гур физвай патарихъ жигъир кутуна…
 
Амма  чи азабар мад рикIел хкиз
Ахпа дерт чIугвамир, минет хьурай ваз!
Ацукьмир йифни югъ зи чарар кIелиз-
Канивал кучуда вуна захъ галаз.
 
Гила  ваз  за шаддиз  уьмуьриз чирда-
Хажалат алуда, тамир а хурал!
Тек садра… гьар йисуз- майдин эхирда
Ша, лацу марварар эцигиз  сурал…