Велед усал хьайила
Рик1 т1ар жеда бубадин!
Намус пакдиз хвейила
Вун дамах я убадин!
Руша шулугъ авурла
Айиб къведа дидедал.
Жувак гьарам кутурла,
Лянет жеда бинедал.
Дишегьлидал темягь фин,
Итимвал туш итимдин.
Квадармир заз гайи кьин
Мягькемдиз хуьх ватан,дин.
Хъуьруьрмир на патан кас,
Хизанда къал твамир,хва.
Усаларна жуван свас,
На ашнаяр кьамир,хва.
Жуваз авур гьуьрмет хуьх,
Квадар мийир инсанвал.
Вуна жуван къимет хуьх,
Ийиз алахъ хъсанвал.
Гьич садрани алахъмир
Са гъиле кьве къарпуз кьаз.
На жув зерре къвалахъмир
Рекьер ачух тирла ваз.
Вун стхадиз герек я,
Ч1ижрез даим цуьквер хьиз.
Буба,диде куьмек я,
Йифиз варзни гъетер хьиз.
Уьмуьр пакдиз твах,зи хва,
Леке тегъиз виждандал!
Рик1евайди лагь,зи хва,
Къадирлу хьухь хизандал!