Заз ахварай хайи дагълар аквазва,
Мублагь чуьллер, къацу никlер,яйлахар.
Шир-шир ийиз завди ширин рахазва
Капашдалди за яд хъвайи булахар.
Цуьквери зун кьазва чпин къужахда,
Вичин велед кьадай жуьре дидеди.
За ватандин иервилел дамахда,
Рик1е аваз пак к1анивал эбеди.
Кьилер рехи, такабурлу дагълари
Заз яргъарай кlанида хьиз хъверзава.
Гьейранна зун цуькведавай багълари,
Рикlи хура хайи чилихъ зверзава.
Дамарар хьиз фенвай къати вацlари,
Дуазава гьамиша зи гуьгъуьниз.
Зи дидедин ванцелди заз кlамари
Эверзава хайи ватан, муг хуьниз.
Зи чилеллай къалгъанарни кlан я заз.
Вергедини зун зи чилел кайид туш.
За гьар са кам къачузва халкь рикlеваз,
Ватандилай захъ багьа затl хьайид туш.