Ви уьмуьрда гатфар хьурай зулузни,
Къуй килиграй т1урфанар ваз яргъарай.
Кьисмет тахьуй пашманвал са ч1авузни,
Дат1ана ви гьайдиз гуда за гьарай.
К1анивили муг авунва рик1е зи,
Ви муьгьуьббат зи илгьамдин дестек я.
Гьар гьи к1валах хьайит1ани гъиле зи
Куьмек ийиз аквадайди вун тек я.
Ви к1анивал багьа я заз гьамиша,
Зи сваса зав вугай сифте бала хьиз.
Зун акурла катмир закай, саймиша,
Регъуьвал бес я ийизвай сваса хьиз.
Ви хуьр галай патахъди зун элкъвена
Лап гьар йифиз физва ширин ахвариз.
Ви ашкъидин лепейра зун эхъвена,
На зи уьмуьр элкъуьрна шад сувариз!
Ви уьмуьрда гатфар хьурай зулузни,
Кас тахьурай к1ур гудай ви гьиссериз.
За ийида дуа йифиз, юкъузни
Вун гьамиша акун патал вилериз!