ГЬИКI Я КУЬН, КIАНИБУР?
ГьикI лугьун ваз, Видади дуст, хъсан я,
Ихьтин жаваб, гьар са тIалдин дарман я.
Гьакъикъатда кьазватIа, на хабарар,
Чи яшариз кутугнавач тапарар.
Гатфари цуьк гъана, тIегъуьн азарди,
Дуьньядин халкь гьелекна и бизарди.
Шадвал амач, а виликан саягъда,
Низ минетда, лагь, вуна низ гьарагъда?
Шиирарни кIамач ерли туькIуьриз,
Я экверни кIамач, йифиз куькIуьриз.
Сивел маска, гъилерални бегьлияр,
Алаз акур чIавуз, физва зегьлеяр.
Амма, руьгьдай аватун - хас кIвалах туш,
Уьмуьр, даим авахьзавай булах туш.
Гьайиф къвезва, физвай уьмуьр бушдаказ,
Муштулухар гузни жезмач хушдаказ.
Хабар кьурдаз, хъсан я, дуст, - лугьузва,
Жув, лагьайтIа, гьакI хиялри тухузва.
Аллагь, Аллагь, гьуьрметлу дуст Видади,
Хъсанвилер гун чи халкьдиз Худади!
Сажидинан мурадни я - хъсанвал,
Къуй, гьамиша гумукьрай чахъ инсанвал!