Гам хранва т1ебиатди
Къизил, жегьре рангарив.
Мес вегьенва лацу дагъди:
Им вуч вахт я ахвариз?
Гьикьван хуш я зулун бере,
Хур ац1уриз гьисерив,
Михьи рангар шумуд жуьре,
Гьис ийизва вилери.
Сад-кьве емиш тараралла,
Чиг ацалтна нурар гуз.
Къушари луж цаваралла,
Мекьерикай хабар гуз.
Мад къведа рагъ цавуз, гагь-гагь
Чимивал гуз гатуз хьиз.
Гьа и ч1авуз кьил лацу дагъ
Аквада лап ялгъуз хьиз.
Бязи пешер, гьайиф хьана,
Ч1улав жезва чилерал.
Мад вучда, зул элиф хьанва,
Чуьлда амач бегьерар.