Багъри йиз юрд Табасаран

             

     Багъри юрд…Фу ву думу? БицIи вахтнахъанмина уларикк ккади гъабхьи уткан, жара йишвариъ текрар даршлубсиб табиаьт… Сабпи гамар алдагъу, сабпи гафар, сабпи гьярфар гъудургъу, гьар вахтна кIваъ айи, фикрариъди, нивкIариъди кьяляхъ хътакру йишв…
Шлиз – вуш гъул, шлиз – вуш шагьур…Узузра, лап ужуди таниш вуйи йиз ккуни бицIи Вечрикк гъул, гъумши гъулаъ айи мектеб, йиз багъри гъулак карснайи Куркакк, ЖагътIил гъулар…Гьацира,узуз гизаф кьабул вуйи йиз дадайин багъри ВартавтIил гъул…
      БицIи вахтари аьхю гьюкуматси гьибгъри гъабхьи, уткан табиаьт айи багъри Табасаран …
 Йиз багъри юрд – бабан чIалнан дарсар киву институт, тербияйин мукь…Хиял апIин, дюн` яйиъ адар сарун я жара чIалар, я жара юрдар…
     Вари гъулариъ яшамиш шулайи инсанарра, багахьлуйирси, албагну яшамиш шули айи  йиз гирами макан! Гьаму китабдиъ айи гизафстар шиърар багъри юрдарихьна вуйи марцци гьиссарин кьувватниинди арайиз гъафидар вуйиз. Мумкин ву, гизаф йисариинди ихь юрдарихьан лап ярхлариъ яшамиш шулайивали, думу гьиссар йиз кIваъ артухъ гъахьну.Узхьан удукьруси, йиз фикрар шиърарин цIарариъ иври, жигьил вахтари халачи гъядабтIруси, китаб гьязур гъапIунза.Поэзияйиин юкIв алидариз йиз му юкьубпи шиърарин гъварч кьабул шул кIури умуд кивраза.