Гьайиф чIугвамир!

 

Садаз гаф жагъизмач гьахъдин базарда,
Саданди- пехилвал, гьатна  азарда...
Какурда синихдив  дуьзди бизарда,
Гьайиф чIугвамир!

АвачтIа инсандихъ дуствилин вафа,
Къайда я-гуда ваз азият, жафа,
Къекъвемир марвардихъ къалгъанрин чIафа,
Гьайиф чIугвамир!

Садра чIехи авур бармак са юкъуз,
Мад жуван вилериз  аватна лугьуз
Ацукьмир сефилдиз вун кузни хъухъуз,
Гьайиф чIугвамир!

Гайи куьмекрикай хкатIзава хъел-
Жидадиз элкъвена хквезва  винел.
Са касдин берекат алатIа гинел,
Гьайиф чIугвамир!

Алахъа вун кисна мадни халкь патал,
Хкягъмир садрани шегьре, асантвал.
Килиг, давам хъия ийиз хъсанвал,
Гьайиф чIугвамир!


Къуллугъдин лукI хьана, са ни ятIани
Низ ятIа  лугьурай тарифдин мани.
Бахт тушни цIар кхьин, эллериз кIани,
Гьайиф чIугвамир!