Ихтияр це, са тIимил кьван,
Агатин вав, я эркиван.
Нур къалура, ахъая чин-
Хушбахт чIавар рикIел хкин.
Ихтияр це, са тIимил кьван,
Яргъал хьунин себеб жузан.
Чукурин за чIулав цифер,
Яргъи хъийин верцIи йифер.
Ихтияр це, са тIимил кьван,
Чак кьведакни синих кутан,
Эвел хьиз ваз татурай хъел,
Вегьидач мад хирерал кьел.
Ихтияр це, са тIимил кьван,
Ахъайин мад дердер жуван,
Белки чизва, акъвазмир, лагь,
Гьи патай чахъ галукьна агь?
Ихтияр це, са тIимил кьван,
Пехилбурал вегьин за къван!
Булах хьана алахьин зун,
Ви ятарик акахьин зун!