Адил:
Дагъвидин руш рикlе гьатна,
Зи тандавай руьгь гагьатна.
Адилан юкь сада кьатlна,
Акъваздани гъил-гъилеллаз?
Марьям:
Рикlе ашкъид цlай амани?
Зулун йикъар перишан яз!
Гьуьжет ийир кар амани?
Фейи йикъар гуьлуьшан яз!
Адил:.
Лугьуз тежез гафаривди,
Лув гуз жезмач луваривди.
Заз аквазвай ахваривди,
Туна на зун нагъв вилеллаз.
Марьям:
Гафари ваз куьмекдани?
Луварни ваз герекдани?
Ахвари вун гьелекдани?
Рикl секин яз акурай заз!
Адил:
Сад виртlеда,сад агъуда,
На заз кьуьд це,за гад гуда!
И дуьньядлай вуч тухуда?
Сад дагълара,сад гьуьлеллаз!
Марьям:
Вуж агъуда,вуж виртlеда?
Гатфар на це,за зул гуда!
Фикир хьурай а келледа,
Гьар са емиш за бул гуда!
Адил:
Кьакьан къавал акьахда зун,
Акваз кlан яз,вил рекьеллаз.
Рекьидалди алакьда зун,
Килигиз кlанз рикl-рикlеллаз!
Марьям:
Рекьимир вун,жемир ужуз!
Шад хабарар чаз атурай!
Рикlиз ядан чна бургъуж?
Чна ахпа вуч авурай?
Адил:
Чими гатуз вун зи къвалав,
Ватандикай пай галаз ша!
Йенгеярни кьведни къвалав,
Рикlик ашкъид цlай галаз ша!
Марьям:
Къведайла зун а ви патав,
Паяр за ваз пара гъида !
Мукьва-кьили а ви къвалав,
Гьидаз гьихьтин хара гъида?