К1АЙ МОРХАШ ЛАКХЕ ЙОЛХАР Мустафа Ганижев
Лакхе лаьца, уж к1ай морхаш йолх,
Юкъ-юкъе сийна сигале гуш.
Гаьнар шелала духьлен ба малх,
Йолхар морхаш са уйлан т1акхувш.
Воаг1ар со Наьсарер сай юрта,
Гаргар нах къонбаь, гаьна лийнна.
Эзар уйла 1отталуш керта,
Боккхаг1аш д1абахара тайна.
Водар со массанецар къаьста,
Геттар уж байнараш бовза ловш.
Хацар сона царгар хьал диста,
Водар цар бехка, к1алоттар хьош.
Х1анза воккха хинналг сайна гуш,
1аса бейолла ха хьакхаьчай.
Ца дезе а валар да хоалуш,
Кога айраш доагаро, хоам бой?
Халахь! Гуйрена т1ехь бирс 1а долга.
«1ай ялар ма далахь: нанас оалар!»
Из дагайохаш дар уйла елга,
Керахь са 1увдалуш, оарц дувлар.
Гуйре я, г1а 1ажаг1а дерзаш,
Мух хьакхар дар белгала дег1а.
Деррига чурар са оагалуш,
Из дар,тамашне г1айг1ан тийга.
Валар дар сона дагадехар,
Вахар б1ехдара, яха хано.
Со соцалар дар, гонахь хьажар,
1алам дугар г1ийла уйлано.
Х1аьта сигал морхаш яр, йолхаш,
Шоай кхела, согахьа ца хьожаш,
Со вар из деррига го лувхаш,
Низ бацар, кхахетам Даьле бехаш.
…….. тушол 2022 ш.