ОАШ САГОТДАЬДИЙ ШОЙХА Мустафа Ганижев
Дунен морзало д1айовра а кхераш
Шоайха саготаде дийзадий шуна –
Шо доаца вахар, наха мерза дуаш,
Саготде дагадехадий шоай къина.
Даха вахар хий т1ар мо боарах* хьагуш,
Т1ехьлен ейна д1айовш, махбу сина.
Иштта шоайха къахеташ, доглазаш,
1ехалуш дуненна, ираз дайна.
Хано дохкар, бердах чу ца тоссе а,
Цхьа атта лелара кхы мах боацаш,
Догдахара 1ехадана хуле а,
Ца йовза хано т1адам оттабеш.
Цун харцо ца йовзара, шо 1ехалу,
Цун тийшаболх хилар дагадоацаш –
Харцо лечкъа цхьане киса ял таралу,
Саг 1овдалг хеталуш, дош ца хеташ.
Х1аьта оаш саготдаьдий шоайх в1алла,
Шо тешаш хилара, догц1ена, атта –
Цу вахар къовсама кхы а са д1адала,
Харц хина вахар дод, халхетар гойта,
Шо тешаш хина, ца кхерара 1елв,
Цхьа бералго мо г1абоахаш баьсса –
Шийгар дар доацаш, цхьаккха эшадала,
Х1анза цу беро мо вахар лох нийсса…
Шо далача хургдар ца кхетадеш,
Линна, даьхад шо ва нах догтийша.
Бирса, харц хин дунено 1ехадеш,
Дар гуш, оаша саготдаьдий маьрша.
Боарах* - рябь.
1аьлий-юрт 30. 09. 2022 ш.