«КЬУДАР» циклдай
*****
Дамахдин гьар кьадар хьанва пуд кепек,
КукупIдин тарифиз алахънава кIек,
Чизвачни кьведанни къастар виридаз-
Вучиз ийизватIа чпи- чеб гьелек?
*****
Кьиле затI авачтIа, ргаз алахьмир,
Жуван гаф субутиз икьван алахъмир,
Ацукьмир хиялра дагъларин кукIвал,
Дегьневал чизвачтIа, вацIариз гьахьмир.
*****
Иер цуьк жедани яргъалди хилел,
Низ чида ...легьзеда вуч къведа кьилел,
Дардавай инсандиз куьмек це вуна,
Хъсанвал гьар чIавуз амукьда чилел.
*****
Гьар чумакь гвайиди чубан жедай туш,
Гьар сервет авайди кIубан жедай туш,
Лап хъсан ятIани ваз уьмуьр гьалун,
Къурбатдин чиликай ватан жедай туш.
*****
Гаф атай чкадал талгьана тамир,
Гьакъикъат вине яхъ- рехне кутамир!
Хиляй гъед къалуриз алахъмир икьван,
Лам гатаз жезвачтIа, палан гатамир.
*****
Чинал ялтахвализ хъуьреда яман,
Тарифда датIана-гудач ваз аман,
КIвачерихъ ярх хьуниз килигмир амма,
Игьтият хуьх жуван, кIасда ви дабан.
*****
Гьяз къвезмач бенбецIдиз кIваликай вичин,
Къуллугъдал хьанва ам, гьалдна маса чин,
РикIелай алудмир, гьакъикъат тушни,
Садрани ацIудач кIан квачир гичин.