.. Г1АДЯХА МОРХАШ* Мустафа Ганижев
Сигала йолхар, г1адяха морхаш,
К1ай жа 1улаш мо гурматах хина.
Сигалар малхах селий 1у хеташ,
Тоаданна жа 1улаш дега ц1ана.
Г1адяха морхаш яр михо лохкаш,
Араволачо наькъа лакхе гуш.
Наькъа моаршала сало1ам боаг1аш,
Салам хул саго морхашка д1алуш.
Яхийла Наьна Наьчн даима,
Г1айг1ане йола хьамсар Г1алг1айче!
Лоалахой бац хьона хулаш тоама,
Х1ирий, нохчий ц1ена питамче.
Морхаш яр цу питама теш хулаш
Г1аьрхоша хьа лаьтташ д1адоахача.
З1амига хина г1алг1ай мохк бахаш,
Цхьан морха хьо ел къайлайокхача.
Аьттув, тоалам хилба г1алг1ай мехка,
Цу морхаш шоай са хьалуш г1алг1ашта.
Хоза хьажах фо хулаш, 1ат1махка,
Питам лоалахой дехкебалийта.
Сигала йолхар г1адяха морхаш,
Дика белха кхаа баккха мехка.
Г1алг1ай сабарца ц1ана ди бахьаш,
Дала даначо хоастам ба дукха.
Из хьал деррига хьагуш синош дах,
Б1арчча самукъдоалаш х1ара денна.
Из ц1и йогача хана бац бе мах,
Къамиргах шод хул, сатохаданна.
Деррига гуш дар морхашта мала,
Г1адяха хинараш г1айг1анга йолх.
Г1алг1ай бала гуш, 1аьржлуш села,
Соцалора цхьан метте, бос цар талх.
Даьла эг1азлон дог1ан ша бар тохаш,
Лаьтта аьга, хий хилар т1адала,
Лоалахошка кхаьчар бала хулаш,
Дука нах бовш, г1алг1ай мехка бовла.
Мичад из г1алг1ашкар даьккха лаьтта?
Х1ирий къаьрал шоашта г1аьххьа йодаш,
Баьхка кхаьчар ца1аш х1ирий х1аьта,
Уж бар, бусалба да тхо яьхараш.
Юх гучайоал г1адяха к1ай морхаш,
Сигленца сийрда малх хьахьожаш хул.
Тирк хий ихача форд лат, г1аж лувчаш,
Дуне мессал яр г1аж г1алг1ашта маьл.
……… … Г1адяха морхаш* - блаженные облака