Яруш, гвадар на ийизвай и инадар ша, бес хьурай,
Гатфар хьанва, чанда хъел ваъ, муьгьуьбатдин гьевес хьурай.
Вун икl акваз зини гъиляй затlни къвезмач, амма мадни,
Вун зав туьхкъуьг, амай крар вичиз вири лап терс хьурай.
На зун жуван хуш дидардиз гьасрет тунва шумуд чlав я,
Са бязани захъ элкуър чин, зи кефини терез хьурай.
Сив патална рахадайбур пара жеда, на яб гумир,
Кlанивили канавай зи гевилдин ваз ван - сес хьурай.
Дуьнья икlа атанвайд я, ашкъ авайна чугъулни жез,
Авсиятар хаз алахъдай гъилер буш хьуй, тентес хьурай.
И дуьняда заз яр хьухь вун, а дуьньядин гьуьруь кlандач,
Женнет багъдин вун билбилдиз зи рикlикай къефес хьурай.
Намик, тек са тlалабда за вун паталди гъуцаривай,
Муьгьуьбатдин дяведа на вегьидай хьел серес хьурай.
03.05.2023 г.