1а боча теркадора берий ага,
Хьай ховхача оазаца доахара иллеш:
Хьо яха са йи1ига массахана атта,
Ма хилда вахар дега 1откъам беш.
Хьайна безачарца даим юхе йолаш,
Цар во ца гуш д1аухалда шераш.
Х1аьта б1аргаш тахан сога лепача санна
Лепалда хьога наьха ц1ена дегаш.
1а безам бекъар в1алла юх ца озлуш,
Ца кхераш шелало хьай готтаяьр,
Хьа фаьлгаш хулар чакхе хоза йолаш.
Вешта, даар - ц1аг1ара эггара мерзаг1а дар.
Хургьяц укх дунен т1а хьамсараг1а кхалсаг,
Са наьна-нана, сона лов хьога ала «баркал»
Яргьяц хьа хам баь таханарча заманга,
Мах оттабаь лоаттаяьча й1овхалона.