НАЬКЪА ТИЛЛАР Мустафа Ганижев
Цкъа ца вийхача не1 хьаелаш,
Лохаш, сай дагадаьлар цига.
Цхьа г1айг1а мара яц елалуш,
Кхы а ца безам бар, гуш дега.
Хьажар со дикан йисте кхача,
Маьхка йисте шув т1ар чухьожаш.
Циг г1а берадаьлар лийг долча,
Сона мела дийзар д1акъовлаш.
Са вахар-м хилац тоадал могаш,
Мела хьажара лаха сай седкъа.
Сигале хьежаш, г1а бар боахаш,
Сайца къамаьлдеш, хулар цу наькъа.
Сигалар некъ хилац товрадеш,
Лаьтта восаш, маькха чам бовзаш.
Ваха лохаш лерх1аме дараш,
Фу де дийзар хьалха г1а боаккхаш?
Удаш хилар х1инар мела хул,
Шина ц1ера юкъе вус, удаш.
Ца ховш яь уйлах, бар, баккха мул,
Дезаг1а дег1 е са да – ца ховш.
Борал, чоаболца хувцаш лийлар,
Догдохаш кхоаве массанахь цкъа.
Вицлуш наггахьа, со саг хилар,
Ха йодилга вицлуш хул т1аккха.
Ваьха ваьнна ха гучайоалаш,
Ца хадаш кхолламбе со хьожар.
Дукха наькъаш ма хилар довзаш,
Ца леча х1инаре деш вагар.
Юххера чухьожа хул шув т1ар,
Д1ахо лакхера йоаг1аш боадо.
Дагадоацар хул б1арчча сай кар,
Ай, фий из? Оалар – каша к1оаго.
Цкъа ца вийхача не1 хьаелаш,
Юххера не1 хургъя каша ваха.
Цига догтешар Даьлах долаш,
Шийлача лаьтта вужавеш наха.
… 29. 08. 2023 г.