И дуьньядин акьуллудни, пехъидини - ам,
И дуьньядин гижидини, секинддини - ам.
Инсан я ам са гъиле цlай, са гъиле яд тирд,
Инсан я гьам дяве кlандай, гьам адаз яд тирд.
Вич вичин и дуьньядаллай тек душман - инсан,
Айни гъалатl хъийиз тикрар, жерд пашман - инсан.
И дуьньяда хъсан крар туькуьрдайди - ам,
И дуьньядин кузвай эквни туьхъуьрдайди - ам.
Гзаф зурба тилисимар ахъайда ада,
Гьам дуьньядин регьятбурни ракьара твада.
Акурбуркай къачудачирд вичиз тарс - ама,
Махлукъатрин виридалай терс тир терс - ама.
Алакьунар гзаф, уьмуьр куьруьдуьни - ам,
Алцур хьана хеб хьиз, гьатдайд суьруьдуьни - ам.
Зунни, вунни, атlадини - инсанар я чун,
Чакай я зи веревирдай, чакай - зи кьатlун.
Чалай вягьши тир мад вягьши махлукъат авач,
Чил амукьуй - бушлухра кваз кьацlанва чи кlвач.
Ша яваш жен, ша акъвазин, ял ягъин са кlус,
Инсан ихьтинд тежердийди жедатlа кьатlуз...
Ша тан тийин вили цава чlулав циф хьурай,
Лув гудайди гуьлле тахьуй, лацу лиф хьурай.
Самолётар, мермияр квай руфунун кlаник
Ахъа тийин, лиф ахъайин, цаварихъ гъарикl.
Зани, нани, атlадани - вирид ахъайин,
Лиферикай ислягьвилин чадур акайин.
Ша бесарун туп - тфенгрин мецерив рахун,
Ша гъуцари незерда кьур инсан хъжен чун!..
Къуй чи акьул хуш ниятрин рекье зар хьурай,
Бегьер гана, чилер, цавар - гуьлуьзар хьурай!..
Ягъун тийиз, цикlир тийиз, куз тийиз жен чун,
Яратмишин, эцигиз жен, туькlуьруьз жен чун...
15.06.2023