"Гаф" тlвар алай кlватlалдал къе чан гъанавай дустар гьей,
Рехъ шегьре хьуй куь кlватlалдин, мубаракрай къастар гьей.
Чи рикlера са умуд я - алцур жедач куь зендер,
Куь арада авач наши - гьар сад гафун устар гьей.
Гъил - гъилеваз алахъна гъваш самбаллу шеъ арадиз,
Гьам масан ччин хьурай адахъ, гьамни гуьрчек астlар гьей.
Гьакlан ади кlватlал тахьуй, ухшар хьуй ам эсердиз,
Танишбуруз акуй адан чем ргазвай мастар гьей.
Акъуд дидед чlалан сурагъ и дуьньядин кьуд пипlез,
Сиве тlвеквен авайкьванда лугьуй квез хуш тостар гьей!..
Белки са къуз алатна рехъ а мубарак межлисдиз,
Савкьат жеда зазни адан хуш макъамар, растар гьей.
03.08.2023