Сабурдив, фагьумдив гьазурна желе,
Къакъатдай чIав хьана-тамам я шеле?
АкI тахьуй, амач зун... сагъзама гьеле,
Кузвай руьгь икьван фад катдани тандай,
Заз вун пара кIандай, лап пара кIандай.
Им яни са гьунар, им я агалкьун,
Жанавур гадарна чакъалрихъ галкIун?
Ялтахдин къилих я кIвачерал алкIун-
Нин ятIа тарифар кьунани сандай,
Заз вун пара кIандай, лап пара кIандай.
Экуьнлай са кьатIун хиялдиз къведай:
«Вавай ам галачиз уьмуьриз жедай!»
Амма йиф атайла рикIи- рикI недай,
Акъудун четин тир ви къамат чандай-
Заз вун пара кIандай, лап пара кIандай.
ВерцIи гафарилай жезмач зун байгьуш,
Дагъдин лекьрез гила лагь вуна байкъуш…
Межнун рикIел хкваш… вун а Лейли туш-
Хкажна кьуначни гьиссерин хандай?
Заз вун пара кIандай, лап пара кIандай.
Пеле акьазва къе августдин шагьвар,
Кьураз акъатзава мадни пIузарар…
Ваз гила ни гузва лацу марварар? -
Жузадач… чIав фена гугрумдай,вандай,
Заз вун пара кIандай, лап пара кIандай…
август. 2023-йис