Демекда, къазмадин хъвалав
Са к1ек авай зирек, ч1улав.
Шумал буйдин к1алуб авай,
Вичихъни къад хнуб авай.
Эверардай ц1угъ акъатиз,
Келледайни бугъ акъатиз.
Лацубуруз гьуьрмет идай,
Муькуьбуруз туьгьмет идай...
Гьик1 ят1ани, гатун юкъуз
Хкаж хьанай са лякь цавуз.
Элкъвезавай гьаятдилай,
Аквазавай суфатдилай,
Гъуьрч жагъуриз къекъвезвайди,
Верчерал ам элкъвезвайди.
Эвер гана к1екре тадиз,
К1ват1 хъувуна верчер к1вализ.
Петюня тир к1екре лак1аб,
Фагъирдизни гузвай азаб.
Лап кьадарсуз зурзаз авай-
На лугьуди аяз авай.
Аквадай вич зайиф хьана,
Шемп1ини гьеч, са кьиф хьана.
Бес фереди и гьал акур,
Квадардачни айиб, абур.
Кич1елав к1ек, рекьизавай,
Садлагьана виниз хьанай.
Гьаятдай акуна адаз,
Лекьре патав са кац гваз.
Чилеллай лекь, кьейид хьтин
Ярх хьана са езид хьтин...
Иесидиз хабар хьанай,
Гъиле авайди к1ар хьанай
Вилив хвена, ацукьайла,
Гадарна к1ар. Галукьайла
Ярхар хьанай, кьена къачах...
К1екрекни гаткана дамах.
Хвешивиляй аслан хьана,
Ялна къецел, т1урфан хьана.
Хкадарна лекьре винел;
Вичикни мад акатна хъел,
Хъсандаказ зурламишна,
Гьараяриз башламишна,
Лап вичин гьа шуьк1уь ванцел,
Элт1ишарна вири вичел:
"Нихъ ават1а ч1уру ният,
Гьа и эхир жеда кьисмат.
К1ур гуда за, тармар ийиз,
Къармахривди кук1вар ийиз.
Петюня туш, аслан я зун,
Ялавни ц1айлапан я зун!"
Сегьнедихъ са жуьре ава,
К1ек, лагьайт1а, гъуьре ава...
Рик1ел хтай ч1авуз хъуьрез,
Мад хьайивал лугьун за квез.
Авазвай к1ек фурсар ийиз,
Хкадариз, гьараяриз.
Лекьре винел ацукьзавай,
Хкадариз, алукьзавай.
Легьзе вичиз хкудзаавй,
Абур виниз акъудзавай...
Гьардаз вичин са т1ул ава,
Гьа т1ул хьтин акьул ава.
Эхир чир хьун хъсан кар я,
Тахьайт1а ам агъур пар я...
Ингье жабдиз акъатна ам,
Хкадарна ахватна ам.
Лекьрел хъсан алукь хьана,
Руфунихъ пис галукь хьана.
Руфунарни сад я вири,
Авайди я гьа са ери.
Саданди я шешел хьтин,
Муькуьдандини цел хьтин.
Басмишайла нефесдин сел
Туьтуьхдайт1уз фена къецел,
Акъатна сес пара яман,
Фагъир к1екрен квахьна аман.
Кич1е хьайла галтад хьана,
Гьа инал рик1ни пад хьана.
Фикир цей: ахварай йифиз
Атайла сес лекьрен, к1евиз,
Бес жедачни пис хьайибур,
Петюня хьиз, кис хьайибур.
За вуч лугьун - фурсар мийир,
Гьар са кардихъ ава эхир.
Петя хьтин к1еве тахьуй,
Кич1евални хиве тахьуй.